शुक्रबार, ५ आश्विन, २०८०
शुक्रबार, ५ आश्विन, २०८०
भैरब खबर डटकम संवाददाता, सोमबार, ९ माघ, २०७९
पाल्पा । सामाजिक कुरीति तथा हानीकारक अभ्यास बिरुद्ध २ दिने सचेतना कार्यक्रम बगनासकाली गाउँपालिकामा आइतवारबाट सुरु भएको छ ।
नेपाल सरकार महिला बालबालिका तथा जेष्ठ नागरिक मन्त्रालय अन्तरगतको महिला तथा बालबालिका विभागको आयोजनामा उक्त कार्यक्रम भएको हो ।
कार्यक्रमको उद्घाटन गर्दै बगनासकाली गाउँपालिकाकी अध्यक्ष सरस्वती चिदीले अहिले पनि सामाजिक हिसावले धेरै अन्धविश्वास र कुरीति रहेको भन्दै ती समस्याहरुलाई समाधान गर्दै जानुपर्नेमा जोड दिनुभयो । अध्यक्ष चिदीले चाडपर्व लगायत बिभिन्न सन्दर्भहरुलाई जोडेर कुरीतिहरु हुने पाइएको र त्यस्ता कुरीतिहरुको अन्त्यका लागि सबैको भूमिका उत्तिकै भूमिका रहने समेत बताउनुभयो ।
गाउँपालिकाका उपाध्यक्ष हरिप्रसाद पाठकले समाजमा रहेका कुरीतिहरुलाई अन्त्य गर्दै आधुनिक समाज निर्माणका लागि आम नागरिकमा सचेतनाको आवश्यकता रहेको बताउनुभयो । उपाध्यक्ष पाठकले हरेक नागरिकले आफ्नो घर, समुदायमा रहेका कुरीतिहरुको अन्त्य गरि सुसस्कृत समाज निर्माणमा लाग्नुपर्ने बताउनुभयो ।
कार्यक्रममा महिला बालबालिका तथा जेष्ठ नागरिक मन्त्रालय महिला तथा बालबालिका विभागकी निर्देशक नीरा अधिकारीले यसप्रकारका कार्यक्रमहरुलाई स्थानीय तहमा सञ्चालन गरि सचेतना अभियान गाउँ टोलसम्म पुगोस् भन्ने उद्देश्य रहेको बताउनुभयो ।
कार्यक्रममा निर्देशक अधिकारी, बिभागकी महिला विकास अधिकृत गीरा कुमारी बस्नेत, जिल्ला प्रहरी कार्यालय पाल्पाका प्रहरी नायव उपरीक्षक बिरेन्द्र थापाले समाजमा रहेका कुरीति र हानीकारक अभ्यास तथा कानुनी व्यवस्था लगायतका विषयमा सहजीकरण गर्नुभएको थियो ।
कार्यक्रममा गाउँपालिकाका अध्यक्ष, उपाध्यक्ष सहित कार्यपालिका सदस्यहरु, विभिन्न महिला सहकारीका प्रतिनिधिहरु, विभिन्न सामाजिक संघसंस्थाका प्रतिनिधिहरु, पत्रकार लगायतको सहभागिता रहेको थियो । कार्यक्रम सोमवार पनि चल्नेछ ।
